Blwyddyn y Canmlwyddiant

Bu 2005 yn flwyddyn arbennig i’r aelodau pan gofnodwyd canmlwyddiant sefydlu’r Gymdeithas. Cynhaliwyd cyfarfod cyntaf Cymdeithas Hynafiaethau Sir Gaerfyrddin yn y Neuadd Sirol, Caerfyrddin yn Ebrill 1905. I ddathlu’r canmlwyddiant yn 2005, trefnwyd rhaglen lawn o ddigwyddiadau, nifer ohonynt wedi’u dewis i gysylltu’r presennol â’r gorffennol a dangos sut y mae’r Gymdeithas wedi mynd o nerth i nerth a datblygu’i nodau ar hyd y blynyddoedd. Dechreuodd y flwyddyn yn Amgueddfa Sir Gaerfyrddin gydag arddangosfa arbennig o rai o’r arteffactau a’r llyfrau niferus a gyflwynwyd i’r Gymdeithas gan yr aelodau cynnar. Canolbwyntiodd yr ysgol undydd flynyddol ar hanes y Gymdeithas a chyfraniadau rhai o’r dynion a fu mor ddylanwadol yn ystod ei blynyddoedd cynnar. Cynhaliwyd y Cyfarfod Cyffredinol Blynyddol yn y Neuadd Sirol, Caerfyrddin, wedi’i ddilyn gan nifer o ddarlithiau. Dr Brinley Jones, Llywydd Llyfrgell Genedlaethol Cymru oedd y siaradwr gwadd yng nghinio dathlu’r canmlwyddiant. Cynhaliwyd picnic â thema Edwardaidd ar dir Amgueddfa Sir Gaerfyrddin, Abergwili. Cynhaliwyd Diwrnod y Llywydd yng Ngerddi Aberglasne gyda swper i ddilyn yn y plasty sydd wedi’i adfer yn rhannol. Aed ar bererindod i Dyddewi ar ddechrau mis Medi, gan adlewyrchu ymweliad y Gymdeithas yn ystod ei hail flwyddyn. Myddfai oedd lleoliad diwrnod maes mis Hydref ac ym mis Tachwedd, cynhaliwyd darlith Gymraeg gyntaf y Gymdeithas ers blynyddoedd lawer. Daeth y flwyddyn i ben ar nodyn Nadoligaidd ym mis Rhagfyr gyda noson gerddorol yng nghwmni cerddorion o Sir Gaerfyrddin.